ده ده کاتب بایرام یئلی اسیر گل
غمين قيلدي کؤنول لري اسير ، گل
باغريم باشين هجران اوخو کسير گل
گل سينه م دن چک يازي يا بو اوخو
ائل ماهني سين سن دينله ييب ، سن اوخو
دده کاتيب سنين ياسين خاص اولدو
بايراميميز قارا گلدي ، ياس اولدو
کدرلندي قلب آيناسي ، کاس اولدو
بير يئردهع کي کاتيب يئري بوش اولسون
ائللر نئجه خوش دانيشسين ، خوش اولسون؟
آنا يورون سؤزو گلجک جوشاردين
شور دنيز تک شپه له تيب ، جوشاردين
اؤز ائلينه گؤزل قوشما قوشاردين
او قوشمالار شيرين بالدي ، عسل دي
ائل ايچينده هله ضرب المثل دي
درد اودونا گرک بير سو چيلينسين
توز ـ توپراقلار گوزگولردن سيلينسين
کاتب لرين قدري آيدين بيلينسين
اؤلمه ميشدن اگلنجه لر قورولسون
آدلارينا تمبر ـ تمثيل ويريلسين
دده کاتب آذربايجان اوياخدي
اؤز ديلينه ، اؤز ائلينه داياخدي
يابانجي ليق عئيرتي بير بوياخدي
جومرد انسان بو بويايا بويانماز
آمما حئييف آغير ياتان اويانماز
دده کاتب چوخلو قورقو قوردولار
ناحق يئره ، حقّه قارشي دوردولار
شوونيست لر سنه تهمت ويرديلار
قارانليغا قارشي يوزو آغ اولدون
هئي ديرچلدين ، هئي اوجالدين داغ اولدون
فاني دونيا ائدنمه دي آل سني
تولامادي يالان ايده آل سني
برهوولادي پيغمبر و آل سني
چون تاپيندين پيغمبر و آلينا
آلدانمادين بو دونيانين آلينا
دده کاتب گؤروم روحون شاد اولسون
اويودلرين ائل ايچينده ياد اولسون
شيرين سؤزون آغيزلاردا داد اولسون
دونيا بويو اونودولماز آدين وار
وحدت عالم ايله اتّحادين وار
بيت الله جعفري لوربالاجيق